تحقيق تدويني

لم يدر بخيالي رغم انه واسع اربع غرف ورسبشن وحمامين ان تقبض علي شرطة التدوين وان اخضع لتحقيق طويل رهيب ، ذلك لانني لم اعرف ان هناك ابدا ما يسمي بشرطة التدوين ، استدعوني في الفجر كعادتهم واخدوني انا واللاب
وفي غرفة التحقيق كان هناك ظابطا ومكتبا صغيرا ولمبة 200 وات ساقطة من سلسلة طويلة تعلوها طبق كبير عاكس علي رؤسنا مباشرة ، جعلت الرؤية محصورة وممكنة فقط في الحيز الذي نجلس فيه ، وكان هناك الكاتب الذي ركب في اصابعه فسبة جديدة الذي سيكتب كل ما سأتفوه به ، ياه اخيرا ، اخيرا صار كلامي مهما وان هناك من سيتلقفه من فمي قبل ان اكمله ليدونه في دفتره الضخم ، حتي ولو كان ذلك لوقت صغير ، حتي ولو كان تحقيقا ، انه حلم
كان الظابط مثل اي ظابط تتخيله ولكن يختلف عليه انه ظابط تدويني ، ستجد هنا اثر ما لعالم التدوين علي وجهه او في كلامه او في تعليقاته
قال في صوت بدا مهيبا في ذلك الجو السريالي : اسمك وسنك وعنوان مدونتك؟؟؟
قلت بتعلثم حقيقي : مصطفي عبد الحكيم عندي 25 سنة حصلت عليهم يوم 6 اكتوبر ، ومدونتي اسمها بصمة وجدان
تراجع للوراء في كرسيه ووضع يده تحت ذقنه الحليق وقال : ويطلع مين فهد بن يونس ده
تبسمت حيث ان الموضوع شكله هيبقي ممتع : يونس اسم عائلتي ، اما فهد فهو اسم محبب لي من زمان من ايام ثانوية عامه ولم اعلم ان هناك مشكلة ما من يمسي الانسان نفسه اي اسم يحبه يعني
انجعص قليلا لا ادري كيف وقال : منذ متي وان في عالم التدوين وكيف عرفته
قلت وانا احاول ان ارجع بذاكرتي للوراء : دخلته في ديسمبر 2006 وعرفت التدوين عن طريق مصطفي خليل صديقي صاحب مدونة لا شيء يستحق ، كثيرا ما قلت له ايه ياعم لا شيء يستحق كده ،لا طبعا هناك الكثير مما يستحق ، ثم انه اصلا تسيطر عليه فكره انه لا جديد تحت ال ......,
قاطعني صائحا : كفاية بس بس ، وانا مالي بصاحبك ولا يعني تحب اجيب رجله في الموضوع
للحظة اعجبتي الفكرة ان اري صديقي فنان جيولجي ماثلا امامه في التحقيق ليعرف ان هناك شيء يستحق وان هناك جديدا تحت الشمس ولكن بما اني طيب وبحب الناس قلت بشكل مسرحي : لا ياسعادة ابية ، مصطفي ملهوش دعوة بالموضوع انا اللي عملت كل حاجه لوحدي
سأل في نباهة يحسد عليها هو ووالدته : عملت ايه ؟؟
قلت له في نباهة احسد عليها وانا وعائلتي جمعاء : مهو اكيد انا علمت حاجه ، امال انا هنا ليه؟؟
مال بجسمه قليلا للامام وقال في جدية : انت خطبت ؟؟
سقطت علي الدهشة كانها جردل ساقع : اشمعني ؟؟
عقد حاجبيه وقال في عصبية مدروسة : انت هنا تجاوب فقط
قلت في عقل بالي ايه المشكلة يعني فقلت له : ايوة الحمد لله انا خطبت
شعر كأنه انتصر في معركة وقال : ولما لم نعرف
ظهرت البلاهة علي وجهي للحظات وانا الذي يحاول ان يخفيها دائما : يا فندم هو المفروض يعني اعلن ده في الشريط الاحمر في قناة الجزيرة ولا انشر الخبر في مجلة الكواكب ، ثم انا اقول ليه ، مكنتش اعرف ان الشرطة مهتمه بخبر خطوبتي ولا خطوبتي تعد جريمة ؟؟
قال بصوت عالي خمس ادوار وارضي : لما يحصل زواج تدويني من غير ما تعرف شرطة التدوين تبقي دي جريمة ولا مش جريمة ؟؟
اسقط في يدي وفي قدمي لا ادري كيف وشحب صوتي وزاغت عيني وقلت : لم اكن اعرف انها جريمة ثم محدش قال يعني ؟
قال بلهجة شرطوية كما قالت الكتب الخارجية : واديك عرفت ، ممكن بقي تحكي كل اللي حصل وبالتفصيل الممل
قلت باسلوب طفولي : انا معنديش موهبة السرد العفوي ده حضرتك اسأل وانا هجاوب علي طول ، متخافش من غير ضرب هقول كل حاجه ، مش بحب البهدلة
قال : اسمها ايه وعرفتها ازاي
قلت : هي واصطنعتك لنفسي وبس
قال : ده بالنسبة للسؤال الاول ، عرفتها ازاي
قلت وفي اشفاق علي هذا الظابط المسكين : وكيف لا اعرف مدونتها يا باشا ، وكيف لا تلفت الانتباه وكيف لا تشدني وكيف لا.....و
قاطعني للمرة الثانية : انتي هتحكي لي قصة حياتك ، ها وايه اللي حصل بعد كده
قلت بغباء اجيد استخدامه : عدم اللمؤاخدة مش فاهم
قال : اقصد ايه حصل بعد ما عجبتك المدونة وشدتك
قلت انا : لا هي مش علاقة سببيه ، اقصد انا عرفت مدونتها من زمان وفيه مدونات كتير جميله وتشد الواحد فعلا يعني ، لكن ده جاء بعد فترة كبيرة عندما كنت افكر في الزواج وكنت ابحث في الجمهورية كلها دون مبالغة ، ولكن جائني خاطر كده يعني يقول : انت تبحث عن بيت طيب ثم تبحث فيه عن واحدة نفس دماغك وثقافتك وشخصيتك ، طيب ايه رايك تعكس الموضوع ، فقلت للخاطر بتاعي : ازاي يا خاطر ، قال الخاطر : عندك علي النت مثلا مدونات –اسم فاعل – كويسين وتقريبا نفس الدماغ طيب ما تجرب ، قلت له انا اتجوز من علي النت ، دا بابا يقطعني ثم ان اهلي في البلد ممكن يحرمونا من دخولها .
قال الظابط بنفاذ صبر : وايه اللي غير رأيك
قلت له : مهو انا جاي لك في الكلام يا باشا ، لما قلت للخاطر بتاعي كده قام هو قالي : طيب ايه رايك لو كانت نفس دماغك ورحت زرتهم في البيت ولقيتها زي ما انت كنت عايز وسألت عليهم ولقيتهم بيت طيب يبقي ايه الوضع ؟ قلت له يبقي موز جدا
وضع الظابط يده علي خده وقال : ها كمل
قلت له : وانا ياباشا واحد بيحسن الظن بنفسه ، يعني عندي ثقة ان ربنا مش هيضيعني وهيختار لي حد كويس ، ثم ان عالم التدوين مش زي عالم النت ، يوجد فارق نوعي وكيفي ، ثم ان لي قرايبي واخواني واصدقائي مدونين ، بس فتوكلت علي الله
قال في فضول : وايه اللي حصل بعد ما رحت
قلت له : اعتقد ان ده شيء يخصني يعني لكن كل اللي اقدر اقوله ان ربنا كرمني جدا ، من الجميل ان تجد من يفهمك ويكون علي نفس الباند وتس
قال : ولما لم تخبر البشرية بذلك
قلت : اولا انا اخبرت العالم بس مش هنا علي صفحات المدونة لكن هناك علي الفيس بوك ، وده المفروض يكون انذار خطر لكم حيث ان البساط ينسحب من تحت عالم التدوين لعوالم اخري ، وثانيا حيث انا مشغول ووقتي ضيق علشان السفر وكده
قال للكاتب الصامت الذي – ويالسعادتي – كتب كل ما تفوهت به : اغلق التحقيق في ساعته وتاريخه
قاطعته انا هذه المرة : وقلت مش المفروض تسألني هل لديك اقوال اخري ، ولا هتعمل تحديث في التحقيق ولا ابقي اقوله في التعليقات
همهم قليلا بمعني ششششش بطل دوشة : ها عايز تقول ايه
سألت بنباهة لازلت احسد عليها : هو عدم اللمؤاخدة انتوا استدعيتوا الاخت واصطنعتك لنفسي
قال مندهشا : لا طبعا
وقفت انا ووضعت يدي علي المكتب وقلت : ليه لا طبعا ، مش هي مدونة ثم هي تشترك معايا في نفس الجريمة ولا انا هتجوز لوحدي
قال كلاما فيما معناه انه يترحم علي الرجولة والشهامة ثم قال : والله هي قالت كتر خيرها
اسقط في يدي للمرة الثانية وقلت : لا انا مش قصدي حاجه ، اقصد يعني كي يكتمل الموضوع يعني بحيث لو حد حابب يتقدم او حد مدون مش لاقي عروسة قدامه في المحيط المادي او حتي لو واحدة اتقدم لها مدون ابن حلال يبقي عنده رصيد تجربة تفرق معاه في طريقة تفكيره
قال فيما معناه والله وفر خدماتك لنفسك وكتر خيرك

وادي يا جماعة اللي اخدناه من الجواز