Saturday, May 24, 2008

انا عايز اتجوز يا شيخ طلبة


كنت مشغول جدا
واول ما فضيت رحت للشيخ طلبة علي طول
كان كما هو لم يتغير لم تعد تزداد عليه معالم الشيخوخة حيث انه وصل للمنتهي وصل لمرحلة التشبع
ولكن هذا البريق الجميل المطمئن الحيوي من عينيه يجعلني اشعر انني امام شابا يملك الحياة بكلتا يديه
قال لي بعد السلام : اتأخرت ليه يا ولد
قلت ببعض من البكش الذي تعلمته : وانا اقدر برضه يا شيخ طلبة انا كنت بهضم المحاضرة اللي فاتت وثانيا انا مش عايز اتقل عليك وان كان حبيبك عسل
قال بسخرية وقد فهمني : والله ؟ طيب قوم امشي بقي روح كمل هضم
قلت وانا اظهر الانزعاج : امشي ودي تيجي برضه يا شيخ طلبة دانا بعد الساعات علشان اجلس بين يديكم ، دا غير اني عايز اكلمك في موضوع مهم رهيب خطير شديد
قال وقد ظهر علي وجهه الاهتمام : مهم رهيب خطير شديد قول يابني
قلت بكل جرأة : انا عايز اتجوز يا شيخ طلبة
اعتدل وقال في حزم : اتحشم يا ولد
قلت ببجاحة لم اعهدها من نفسي :اتحشم ايه يا شيخ طلبة انا عايز اتجوز ، انا تعبت يا شيخ طلبة، عايز استقر في حياتي ، عايز ابدأها ، عايز اعف نفسي ،الدنيا بقت صعبة قوي يا شيخ طلبة انت مش بتخرج في الشارع ولا بتشوف قنوات فضائية ، انا عايز اتجوز يا شيخ طلبة انا هتجوز علي روحي
كان يود لو اعطاني محاضرة عن قلة ادب وجراة هذا الجيل التعيس من الشباب ولكنه شعر بالمشكله وقال وكأنه يلقي محاضرة : ايوة يابني معاك حق ، الذرة لن تتعادل كهربيا الا لما الالكترون السالب يتعادل مع البرتون الموجب ، وذكر الانكلستوما لن يؤدي وظيفة جيدا دون وجود انكلستومايه وذكر .....و
قاطعته : ذرة ايه وانكلتوما ايه يا شيخ طلبة بقلك عايز اتجوز زي الناس مش زي عالم الحشرات ده
قال في استياء : اولا اسمها انكلستوما ثانيا دي مش عالم الحشرات دي طفيليات ، علي العموم انا عايز اقولك اني مقدر موقفك
قلت : طيب والعمل يا شيخ طلبة؟
قال : بسيطة اتجوز
قلت : يا سلام بجد؟ طيب ما انا عارف اني عايز اتجوز
قال :امال ايه المشكلة؟
قلت : المشكلة ؟ مش عارف ايه المشكلة يا شيخ طلبة ؟ اقولك المشكلة، المشكلة اني معنديش شقة ، الشقق غالية جداولكل ما احوش علشان اجيب شقة معدل زيادة الاسعار اعلي كتير مما احوشه
ومصاريف الجواز
والدهب
والخشب انا اعرف واحد كانت جوازته هتتفركش علشان خشب المطبخ اه والله
والتنجيد
ومع ان الدنيا غالية الا انها بتغلي كل شوية قولي يا شيخ طلبة اعمل ايه لما بشوف واحد زي احمد عز ربنا ياخده يتحكم في مصير شباب مصر كلها وهو بيرفع سعر الحديد وهو عادي مش فارقة معاه المهم نفسه ضغط الناس بيعلي مع زيادة سعر الحديد
قولي يا شيخ طلبة لما اللي مسكنا مش بيقدروا غير علينا
بيسيبوا الحرامية والنصابين يهربوا بره البلد
وهما ذات نفسهم بينهبوا في البلد عيني عينك ويفرطوا في مقادير البلد دي
عايز اعرف دخل قناة السويس بيروح فين
عايز اعرف كل ثروات البلد بتروح فين
عايز اعرف ليه بيبعوا الغاز لاسرائيل برخص التراب
ليه يا شيخ طلبة ليه ؟

صعبت عليا نفسي وخانتي الدموع فبكيت فقربني الشيخ طلبة منه وربت علي كتفي في حنان وقال : اهدي يابني خير ان شاء الله انا هجيبلك كباية منقوع دوم مظبوطة تعدل مزاجك
كنت اود ان اعترض او ان اقول لا ولكن ذكر الدوم جعلتني ابكي اكثر
شربت المنقوع الكرية وقلت : انت ايه رايك يا شيخ طلبة وعلي فكرة دي مش مشكلتي دي مشكلة كل الشباب
قال : بص يابني خلينا نفكر بشكل عملي شوية الموضوع ده ليه شقين واحد يخصك انت والشق التاني يخص المجموع والشباب كلها
بالنسبة ليك اقول استعن بالله ولا تعجز
ومفيش حاجه بعيدة علي ربنا
وكل شيء بقدر
والزواج ده رزق ومكتوب
اخلص النية لله وادعوه بكل يقين ان ييسر لك زواجا عاجلا يرضه
وصلي لله وتقرب منه اكثر
واسعي في الموضوع في حديث رائع يقول الرسول صلي الله عليه وسلم : ثلاث كان حقا علي الله ان يعينهم منهم الناكح يريد العفاف
والحديث ده في ناس كتير جربته وفي قصص عجيبة لا تصدق في هذا الموضوع واسأل هتلاقي الناس دي مش عارف ازاي جابت شقة وازاي جابت مصاريف الفرح وتصر علي انها معجزة

قلت : والشق التاني ؟
قال : دي مسئلة قومية ، دي مشكلة بلد
مشكلة ضمائر فاسدة وعقول خربة
وبرضه مشكلة عادات وتقاليد خاطئة
الناس في مصر بتدور علي الشكليات بشكل فظيع
احنا عندنا مشاكل كتيره يابني

قلت : نعمل ثورة يا شيخ طلبة علي الظلم ده
قال : طيب ثورة يوليو عملت ايه ؟ مصر بقت اسوأ من ايام الملك فاروق
يابني احنا محتاجين تغيير حقيقي
محتاجين قبل حتي ما نغير الحكومة والريس نتغير احنا الاول
نتغير كاب او ام و يطبقوا معني الحديث من جائكم من ترضون دينه وخلقه فزوجوه
نحتاج شباب يبحث عن ذات الدين
نحتاج لمؤساسات صالحة تيسر الزواج
محتاجين ناس قلبها علي البلد دي

قلت : معاك حق يا شيخ طلبة المفروض الكلام ده يكون رسالة كل واحد صادق في حب البلد دي
كل كاتب
كل مدون
كل مصلح
مهما اختلفوا في افكارهم لكن لازم يتفقوا

وحدث ما كنت اخشاه ونظر الشيخ الي ساعته وقال : وقتك خلص
قلت : لسه يا شيخ طلبة وريني ساعتك كده كان ساعة قديمة دائرية لها باب ومربوطه بسلسلة فضية طولية
قلت : ياه يا شيخ طلبة الساعه دي مش ظبوطه
ضربني بمنشة صغيرة في يده وقال ضاحكا : امشي يا بكاش
انا والله بفرح لما بتيجي

قمت وودعته وانا افكر هل سأتزوج يوما ما ؟

49 comments:

عصفور المدينة said...

ومن يتق الله يجعل له مخرجا ويرزقه من حيث لا يحتسب

Jana said...

"كنت أود أن أعترض او أن اقول لا ..ولكن ذكر الدوم جعلنى أبكى أكثر"
.......
كادت تقتلنى ضحكاً

"طيب ثورة يوليو عملت ايه؟؟ مصر بقت أسوأ من أيام الملك فاروق"
.........
كادت تقتلنى حسرةً

لن أجد أفضل مما قاله لك الباشمهندس محمد ...
"ومن يتق الله يجعل له مخرجا ويرزقه من حيث لا يحتسب

التعليق ده كله على بعضه متهيألى يجب ان يكتب تحته ..منقول
:))

Empress appy said...

دا انت داخل على طمع بجد
بس والله الحال عندنا بقى صعب ما انت عارف انا داخله زيك كده هههههههههه
بس انا كنت كتبت راى فى الموضوع ده من زمان اسمه عاوزة اتجوز ميكانيكى ومتضحكش ده كان عنوان البوست عندى
وبحاول اوعى فيه الناس انهم بلاش مغالاه
ربنا يرزقك ويسترها معانا بجد فى الجوازة الانتحاريه اللى داخلينها كنت مبسوطه انى شوفتك

Fahd said...

عصفور المدينة

معك حق يا اخي

جزاكم الله خيرا

دعواتك كده معندكش عروسة عدم اللمؤاخذة

سعدت لما شوفتك في الحفل

اتمني ان اراك مجددا



jana

سعدت كثيرا لتعليقك المنقول

انا مش بحب الدوم

والشيخ طلبة مفكر ان سعادتي فيه

ربنا يعطيه طولة العمر




ابي

سعدت لما قابلتك هناك في الحفل

كانت معاكي بنوته صغيره

اسأليها ممكن تقبلني

بس جوازتك مش انتحارية

ربنا يخليكوا لبعض

وتعيشوا في تبات ونبات

رئـــــيسـة حزب الأحلام said...
This comment has been removed by the author.
روح said...

ممممممممم جيت علي الجرح
انا وحدة من الناس بتعاني
من تفكير اهلها وبالذات امي
تموت في المناصب وبترفض من قبل
حتي ماتعرف مين
بس ان شاء الله اكيد
ربك هيكرم ولو اتجوزت قريب
هعزمك انت والشيخ طلبة والدوم عليا
عندنا دوم من توشكي يجنن


بالنسبة بقي لابوجمال وحاشيتة
الفاضلة مش عارفة انا حاسة انهم ماسكين عليه ذلة ولا اية
بيعملوا في البلد ما بدالهم

وبعدين انتوا عندكوا الجواز سهل شوية
عن عندنا يعني بدبلة ومحبس وخاتم بتخطب
ومش عندكوا مشكلة تمدوا الخطوبة لاربع خمس سنين اخطب وبص لكل خطوة علي حدة
وربنا يكرم
وسلملي علي الشيخ طلبة

Dr. Ibrahim said...

والله كلام الشيخ طلبة ده رجل لذيذ

وفعلاً لا يغير الله ما بقوم حتى يغيروا ما بأنفسهم

وسلملى على الإنكلستوما

د/هيما

مشتاق لله said...

السيد فهد لما تروح للشيخ طلبة قل له ان في شاب من ليبيا عاوز يتجوز ومش قادر -بس من طول الانتظار بديت اكره سيرت الجواز -انت جبت الديب من ديلو -لك التحية

mostafa rayan said...

اصبح الزواج بالفعل مشكلة كبيرة

mostafa rayan said...

اصبح الزواج بالفعل مشكلة كبيرة

واصطنعتك لنفسي said...

ده أول زيارة لمدونتك وفكرة الشيخ طلبة عجبتني فعلاً ..لسه ما تجولتش أوي بس ناوية إن شاء الله

هحكيلك علي موقف سمعته من أخ فاضل أحسبه علي خير

الأخ ده كان متقدم لبنت ومن كرم أخلاقه كان خايف يظلمها معاه ..خايف لما يبدأ معاها بداية متواضعة أقل من المستوي اللي هيه عايشة فيه يسببلها ضيق أو تعب ..فراح لشيخ من أهل الثقة يسأله ..الشيخ قاله يعينك ولا يغنيك؟..قاله: ما أعرفش..قاله يعينك لإن الإعانة مش فلوس بس زي الغني..الإعانة تشمل جميع الأمور المتعلقة بالزواج..يعني أضمن أنك لو توكلت علي الله وأخلصت النية لإن ده أصعب نقطة..ثق تماماً أنه هيعينك ..مش بس هيغنيك

أنا مثلاً الموضوع ده لما عرفته أثر فيا أوي ويقيني زاد إن إعانة الله هي الفيصل والله..ولا حاجة في الدنيا تساوي بعد كده

المهم دلوقتي..رأيك إيه؟..يعينك ولا يغنيك؟؟؟

مدونتك تستحق الاحترام
ولها بصمة مميزة

إيمان

يا عالم يا هوووووووووووو said...

ياااااااااااااااااااااااااااااااااااااه كل دول علقوا قبلي
يعني يدوبك يجيلي دور تسمم بسيط بعد الحفلة الميمونة 11 واحد يسبقوني
يلا ماعلينا
انت صحيح يا فهد بتفكر تجوز...... واقعد انا لوحدي..... لأ طبعا تستنى معايا كدة لما نوصل للخمسين نبتدي ساعتها ندور..... يدوبك نخطب على الستين..... ونكتب الكتاب وندخل القبر على السبعين...
إيه رأيك

Fahd said...

رئيسة حزب الاحلام

لا ان شاء الله مفيش ياس

والاحلام هتكون واقع جميل في يوم من الايام

ولكن لا يمنع فعلا من عمل ثورة علي العادات والتقاليد والافكار الخاطئة

وعمل ثورة علي الظلم والنهب والسرق

سعدت بمرورك ونسأل الله الزواج




روح

كلنا بشكل او بأخر نتأثر بثقافة الاهل اما اهلي او اهلها

لنا الله

بس متنسيش لما تتجوزي قريبا ان شاء الله تعزميني

مين قالك ان الجواز عندنا سهل مكنش ده بقي حالنا

ربنا يستر

Fahd said...

د هيما

الشيخ طلبة هيفرح قوي لما يسمع الكلام ده

سعدت بمرورك



مشتاق الي الله

حتي الناس في لبيا يا اخي عندهم مشكله في الجواز

امال نروح فين يعني

نروح تغرق علي سواحل البحر المتوسط

تصدق فكره

Fahd said...

مصطفي ريان

الجواز مشكله كبيره

لكن هذا لا يدعو للياس بل يدعو للعمل

ربنا كبير



واصطنعتك لنفسي

حقيقي سعدت كثيرا بتعليقك

كلامك جميل

وفكره يعينك ولا يغنيك اول مرة افكر فيها

ربنا يكرمك

فعلا

العون اشمل

ليس مالا فقط

اتمني تكرار الزيارة


يا عالم ياهووووووووووه

ايه ياسر يا عسل

انت مين حسدك يابني

انت كنت منور الحفل

بس احنا هنتجوز مع بعض

مش هنستني للخمسين
قريبا ان شاء الله

Unknown said...

اخي الحبيب
ربنا يبارك فيك ويحفظك ويبارك كمان في الشيخ طلبة
موضوع صعب جدا ولو كان له حل مكناش قعدنا كده بس نستعين بالله ونصبر ,وفعلا دلوقتي لو الواحد يقدر يتزوج بأبسط الامكانيات يعمل كده لان الدنيا صعبة جدا ,تزوج ولو معاك مرتبة وقلة ميه وكسرة خبز
:)
ربنا يرزقنا من لدنه رزقا حسنا
وجزاكم الله كل خير

abdo said...

السلام عليكم
بجد الموضوع جميل جدا
انا ضحكت جدا عند ذكرك للدوم ولازلت أضحك وأنا أكتب هذ التعليق
بس أنا عايز منك خدمة :)
تدلنى على الشيخ طلبة أحسن أنا عندى حاجات كتير قوى عايز أسأله عليها وإن كان على الدوم فربنا يستر وهنستحمل
ما إحنا مستحملين كتير مش هتيجى على مشروم دوم
وجزاكم الله خيرا

Fahd said...

الفاتح الجعفري

مرتبة وقلة مية وكسرة خبز

انا عرفت ليه انت متجوزتش لحد دلوقتي


يابني قد اسمعت لو ناديت حيا




عبدو

طبعا ده بعيد عنك

الشيخ طلبة هو كنزي انا


لو عندك مشاكل ابعتها في ميل

سعدت بمرورك يا اخي

طبعا الجواز مشكلة مين قال غير كده

أم أحمد المصرية said...

صديقي فهد
بعد السلام عليكم و رحمة الله رزقك الله ما تتمني انا اول مرة ازورك و عجبتني قوي حوراتك مع الشيخ طلبة ان شاء الله تواصل دائم

NIDAAL .R said...

اقولك يا فهد
روح لخيخة خد لك عروسة مريحة للعين بالكتالوج و الريموت من عندها
ربنا يوفقك و يرزقك و تتجوز و وتشيل من عوانس مصر واحدة
اى خدمة

Anonymous said...

على قصر الموضوع دة لكن جه فى الجول فعلا موضوع هادف بس انا حاسس كدة انة لسة ناقص شوية وبعدين مينفعش كدة مش كل مرة الوقت يخلص قلى بس انت قاعد فى سيبر مين وانا اوصى عليك يسبوك شوية ههههههههههه وبعدين بلاش تسيح كدة لنفسك وتقول انك عاوز تتجوز وبعدين مجبش سيرة العتولة كتير احسن انا خايف عليك انا وبعدين فى الدوم دة ادام مبتحبهوش متروحشى للشيخ طلبة

Anonymous said...

السلام عليكم ورحمة الله وبركاته
أسجل إعجابى بأسلوبك المتميز
وطرحك القيم
تقبل تقديرى واحترامى
أخوك
محمد

Fahd said...

ام احمد المصرية

جزاكم الله وخيرا

ويارب يخلي ليكي احمد

وان شاء الله هتجوز قريب

انا عندي يقين سعدت بمرورك وتعليقك







نضال

شكرا يا اخي ليك علي الوصفة دي

انا هروح لخيخه يا عالم

Fahd said...

محمد صابر

ربنا يهديك يابني

بس تعرف انت اول واحد يشتكي من ان الموضوع قصير

انا مش قاعد في سايبر


الراجل وقته مهم جدا





محمد الجريجي

اشكر ليك مرورك وتعليقك الجميل

جزاكم الله خيرا

ساره عمر said...

فعلا الجواز اصبح مشكله لكن مشكله احنا الي صنعناها لانه لولا المغالاه ماكنتش وجدت المشكله دي وكان بقي الامر غايه في السهوله
ليه الاهل ميقبلوش بالشاب علي مامعه من القران او مايحفظه من سنه رسول الله عالاقل ده دايم غير المال لانه ممكن فاي وقت بيضيع
ثاني حاجه ان بردوا في اسر مبتغاليش فالمهور وانها لو هي ذات دين فعلا ومن بيت ملتزم ولا هيفرق معاها اي اموال خالص وهتاخدك علي اساس دينك وبس
ربنا يكرم شباب المسلمين بازواج صالحات

§a§a said...

ذى ما قالك الشيخ طلبه بالظبط كلام مظبوط ميه فى الميه بس دلوقتى بردة بعض الافكار تغيرت بخصوص الزواج وعادات لناس فى الغلاء فى المهر والكلام دا
يعنى بقى الناس بتفكر شويه بنظرة موضوعيه فى ظل الاسعار والمشاكل الموجودة وخاصه ان نسبه الزواج ايضا قلت فدى مش مشكله شباب بس مشكله كمان بنات

لان نسبه العنوسه زادت جدا فى مصر

انا قبلك اتمنى اتزوج

يلا نعمل فرحك وفرحى فى يوم واحد

بس الله المستعان

تحياتى

Fahd said...

حنين

والله يا حنين انتي بتقولي كلام حلو قوي
وعلشان هو حلو قوي مش واقعي

ممكن بعض الناس يعملوا كده لكن قليلين

ربنا يجوزنا املنا في ربنا كبير



sasa

والله انا هفرح لو نظرة الناس اتغيرت

ده يوم المنى


ان شاء الله نتجوز قريبا باذن الله

الفاتح اليعقوبي said...

السلام عليكم
ربنا يجوزك ياسيدي بدل انت تعبان كده ههههههههه
سيبها علي الله ياسيدي وربك هايحلها لوحده اقعد ادعي انا عايزك تدعي كتير قوي بيقين علي الله وهاتشوف اللي عمرك ماشوفتوا ثم روح لاي اخت اي كانت اي واحدة واطلب ايدها للجواز ولو ابوها او اي حد من طرفها اعترض قلهم انا صديق شخصي للفاتح اليعقوبي ومش هاقلك الوصفة دي جوزت كام واحد

ههههههههه
ربنا يخده احمد عز واشوفه كده يارب متعلق من سيخ حديد داخل من ودن وطالع من الودن التانية
قول امين
والسلام

علم الهسس said...

انصحك لو عايز تجوز
تخلى مهرك
5 طن حديد
و3 طن اسمنت

وربنا معاك
لو جيت عندنا فى الهسس
هاتجوز من بنت هسوسة
ومن غير تكاليف ولا حديد ولا اسمنت

واوعى تنسى انت تسير على كوكب الهسس

ابن رشد said...

على فكرة بقى الكلام اللي نت كتبته انا هقلك ان في نقطة انا متاكد انها صح
انوي الجواز على حق ربنا بغية العفاف و شوف ربنا هيباركلك قد اية

ابن رشد said...

على فكرة بقى الكلام اللي نت كتبته انا هقلك ان في نقطة انا متاكد انها صح
انوي الجواز على حق ربنا بغية العفاف و شوف ربنا هيباركلك قد اية

Fahd said...

الفاتح اليعقوبي

انا هجرب الوصفة

بس تعرف لو باظت الدنيا مش هقولك هعمل فيك ايه

شرفت يا غالي


عالم هسس

صحيح هو هسس بس مش للدرجاي

هو انا هتقدم لعمارة ولا ايه

حديد واسمنت

طب ما اجيب زلط ورمل

سعدت بمرورك



شمس الزناتي

ان شاء الله وربنا يجوز كل شباب المسلمين ان شاء الله

اشكرك علي المرور

موناليزا said...

ومن يتوكل على الله فهو حسبه"

اقتراحك وافكار الشيخ طلبة تحترم جدا
وياسلام لو نفذت"

Asmaa mahaba said...

بص يا استاذ فهد الاول دى اول مره ادخل هنا وثانيا الزواج من الاشياء اللى لو سعيت فيها ربنا بيتممها وبيرزق انا لاحظت على الرغم من ان فى المحافظات والاقاليم المطالب للاهل اغلى من مطالب فى القاهره وبتوصل الاسعار لحاجات خياليه ...بس بيتجوزوا اكتر مننا هنا المشكله هم هناك مش مكلكعينها كل واحد من ولاد خالى خلص دراسته وفتح محل ايجار وتاجر واجر شقه ايجار جديد وظبط نفسه والعفش هناك هم اللى بيفصلوه اسعاره بتكون اقل من هنا
لا تتخيل ما شاء الله امورهم تيسرت ازاى وحاجه جابت حاجه بسرعه لكن احنا هنا ان مكانتش الوظيفه اتخرج مهندس اشتغل مهندس مينفعش اتخرج دكتور لاشتغل دكتور يا لامؤاخذه
الشقه ان مكانتش تمليك سورى...ولازم المايكرو قرف والتلاجه ميتين قدم والغساله الفوتوتوماتيك
يوووووووووووه انا اشعر اننا عملنا زى بنى اسرائيل صعبناها فربنا صعبها علينا....نصيحه ليك اعقلها وتوكل على الله ...ولو فى سكه امشى فيها وحتجد تيسير غريب من عند ربنا قادر على كل شىء
وغلبنا نقول للبنات تعف مفيش فايده لازم محزق وملزق عشان يعجبهم
ربنا يهدى الحا دى بقيت مشكله جيل كاااامل ولها اسباب كتير مش الحكومه لوحدها هى السبب لازم الناس تعمل ثوره بس على افكارهم
تحياتى ليك سومه_87

MiraMar said...

السلام عليكم
مدونتك بجد جميله
والموضوع واقعي بشكل مؤلم
بس انت عارف؟
ربنا كريم
ان شاء الله
:)

.:.-=- ELGaZaLy-=-.:. said...

ههههههههههههههه

عجبنى انا الشيخ طلبة اوى ..

بس انا مع استاذ محمد...

ولو نويت بحق هتلاقى مليون الف سكة رزق اتفحت...

تحياتى يا فهد

Fahd said...

موناليزا

جزاكم الله خيرا

ربنا ييسر الحال ان شاء الله

اشكرك علي مرورك



سومة

اولا اهلا بيكي في المدونة واتمني متكونش اخر مرة

كلامك مظبوط فعلا

لكن مين يسمع

لا حياة لمن تنادي

Fahd said...

ميرامير

متشكر جدا

الواقع مؤلم نعم ولكنه ليس مستحيلا

اهلا بيكي في مدونتي





الغزالي

جزاكم الله خيرا

ربنا ييسر الحال ان شاء الله

انا عندي امل وعمر

ههههههههه

Tamer Nabil Moussa said...

والله كلام الشيخ طلبة صحيح لازم كل واحد فينا يغير نفسة والسلبى يكون ايجابى وبعد كدة كل شىء هيتغير لااحسن

زى ما تقول لواحد لاترمى زبالة فى الشارع يرد يقول عيا جت عليا

مع انة لو عمل وحطها فى سلة المهمىت المكان الصحيح مش هيكون فى مناظر سيئة فى البلد

لازم كل واحد يدخل على البدايةوبقلب جامد

مدونتك جميلة واتمنى التواصل الدائم بنا

مدونة افكار حرة 1

تحياتى

كلام على بلاطة said...

عايز ابصم ونسيت الختامة
اعمل ايه
والوجدان ازاى بتاخد بصمتها
تحياتى

أسيرة said...

حلوه هتجوز على روحي دي ..
:)


بالنسبة لصُلب الموضوع - على إعتبار إن عز باشا ذُكر فيه - واضح إن الزواج الأيام دي محتاج فعلا معجزة .. يعني لو حصلت المعجزة الكبيرة و كان فيه شقه لازم تحصل معجزة تانيه علشان تتفرش و لو المعجزتين حصلوا لازم تحصل مُعجزة تالته و تلائي عروسه مناسبة بنت حلال
شوية مُعجزات لازم تحصل علشان يتم الموضوع

الله يكون في عون الشباب فعلا .. بجد ألتمس لهم الأعذار من إللي بيشوفوه سواء برضاهم أو غصب عنهم في الشوارع و الجامعات

الموضوع فعلا محتاج إخلاص النية لله تعالى و الثقه فيه و التوكيل عليه

من يتقِ الله يجعل له مخرجا و يرزقه من حيث لا يحتسب


المدونة لطيفه جدا .. الله يجزيك الخير عليها

مجلة سيكولوجية مصرية said...

ههههههههههههههه

لست وحدك الذى تسأل هل
سوف تتزوج أم لا

ولكنى وجدت حل للموضوع من فترة ياريتك
تشوفه على اللينك دا

http://alexandy.blogspot.com/2007/10/blog-post_9295.html

على فكرة واضح أى هأكون من الزوار الدامين على مدونتك
وعشان كده ضفت لينك مدونتك عندى

بس ياريتك تكبر الفونت شويه
عيني اتمققت

وكمان عايز أعرف هو مين الشيخ طلبه ؟؟؟


تحياتى

أحمد مصطفى

Fahd said...

تامر نبيل

فعلا يا اخي لازم احنا نتغير قبل ما نطالب حد انه يتغير

سعدت بمرورك عندي

المدونة نورت





علي بلاطة

نسيت الختامة ليه

ثانيا بصمة الوجدان مش صعبة هي بس عايزة احساس صادق وحقيقي

سعدت بمرورك ودمك الخفيف

انتظرك مجددا

Fahd said...

اسيرة

اشكرك علي مرورك للمرة الثانية علي التوالي

اتفق تماما فيما تقولين

نحن نحتاج معجزة او بمعني اخر نحتاج توفيق من الله

يلا كل شيء بقدر

كثيرا سعدت بتعليقك








احمد مصطفي

انا اسعد يا احمد اننا نتواصل مع بعض

شكرا انك ضفتني وصدقني اول ما اعرف اضيف الناس هضبفك

دمت اخي سالما

Empress appy said...

يا عم ما تصحصح الشيخ طلبه بقى عاوزين نتنقاش بحب كلامه قوى هات الجديد

كوارث said...

والله وانا كمان عايز اتجوز يا شيخ طلبة بس الحمد لله يعني مش وقته خالص
طبعًا تلميحاتك في الموضوع جميلة جدا وبايدك فيها كلها بلا استثناء
وموضوع الانكلستوما شكلك بتقرا لدكتور احمد خالد لان ده طريقته في السخرة تقريبًا
عامةً الموضوع جميل والحوار لذيذ ضحكت فيه من قلبي اكتر من مرة
شكرًا تستحقه لك

rovy said...

تحياتى لك وللشيخ طلبه
اكيد كلنا متفقين عل ان التغير لازم يكون مننا .. ان الله لا يغير ما بقوم حتى يغيروا ما بأنفسهم .
وبرضه اكيد كلنا عندنا اسئله كثيره محيرانا ونفسنا نلاقى لها جواب .
سعدت بمرورى بمدونتك ودام التواصل ان شاء الله .
خالص تقديرى وتحياتى
rovy

Fahd said...

ابي

حاضر حاضر هيكون في موضوع قريب




كوارث

شكرا علي مرورك

انا فعلا بحب احمد خالد توفيق واكيد متأثر بيه

وكيف لا يتأثر به من قرأ له

Fahd said...

اسوور

هو يمكن انا مفهمتش قوي بس هدخل علي اللينك واعرف



rovy

انا اللي اسعد بمرورك عندي

فعلا لازم نتغير احنا الاول قبل ان نطالب بتغيير في العالم

وجزاكم الله خيرا