بصمات لا تنتهي

عز صديق البيئة

حينما نزلت موقع في مدينة السادات كان المصنع اللي هنشتغل فيه بجوار مصنع عز , مصنع كبير وفخم وضخم كما لنا ان نتصور
واثناء وجودي في المصنع رأيت غبار كثيف ودخان يغطي المنطقة لمدة دقائق ثم ينقشع تدريجيا ثم يعود مرة اخري فسألت الناس هناك ما سبب هذا الغبار قالوا انه مصنع عز (طبعا ونعتوه بشوية كلام كده)بيصهر الحديد بوضع مادة ديناميتية فوقة مباشرة فينصهر فتخرج هذه السحب الكثيفة من الغبار والذرات والدخان
فقلت بس ده خطر عليكم جدا ذرات الحديد والشوائب دي هتترسب علي الرئة وتعمل بلاوي
فقالوا ما احنا عارفين بس نعمل ايه

طب والناس معملوش حاجة

قالوا الناس اشتكوه فراح بني مسجد وجنينة كبيرة لهم فالناس فرحت وراحت تقول عز صديق البيئة

زاد بي الشعور بالغيظ وقلت في محاولة يائسة :هو مين ماسك الدايرة دي ,فقالوا احمد عز

وجدت نفسي رغما عني اقول عز صديق البيئة



لو عايز تتشهر اشتم في الاخوان

بجد لو عايز تتعرف وسط الناس او عايز تسوق لمجلتك اتكلم عن الأخوان ولو عايز تخلي الموضوع سخن اشتم فيهم

ناس كتير ومجلات كتيرة عملت كده

برنامج حالة حوار الناس معرفتهوش الا لما قد يلعن في الاخوان واللي اسس الاخوان في فترة الانتخابات

المصري اليوم طلعت الاول كصديقة لهم فأيدها الاخوان وبعد كده باعتهم للحكومة وشهرت نفسها برده

روزاليوسف ربنا يهديها معندها شغلانة الا ان تسب الاسلاميين واولهم الاخوان المعفنيين الرجعيين ولاد ال........

حتي الدستور استخدمت نفس التيمة حتي تحظي بنسبة انتشار واسعه

الاسبوع لما تلاقي الدنيا هادية ومفيش مواضيع سخنة تخش تنقد في الاخوان والصف الداخلي والحرس القديم والجيل الجديد الذي يريد الانشقاق

صدقوني حتي انا فكرت في كده انا عايز مدونتي تتشهر فأكيد هاكتب عن الاخوان

دلوقتي لازم تحدد موقفك هتكتب عنهم ولا هتشتمهم قبل ما تفكر تعمل جريدة



الشعب المصري والعيش البلدي


في تحت بيتي فرنة عيش ...معني ذلك الواحد بيعاني الامرين .. دوشة وزعيق وخناقات ..واحدث انواع الشتيمة الطازجه تصل لمسامعي رغما عني
المهم سكان الشارع اللي انا فيه اللي مصبرهم علي الفرنة دي طبعا غير انه العيش بيجلهم بسهولة انهم بيموتوا في الخناقات اللي بتحصل

اول ما يسمعوا ان في خناقة تلاقيهم كلهم في البلكونات بيتفرجوا بشغف

وتزيد الاثارة لما تكون بين ستات

بيوقعوا بعض علي الارض ويشدوا في شعور بعض ...بتبقي حاجه مريعة

المهم ده مش موضوعنا

يوم 17/10 صحينا لا قينا الدنيا عمالة تمطر وهاتك يا برق ويا رعد حاجه مرعبة

الغريبة اني لما بصيت علي الفرنة لاقيت الناس واقفين برده رجاله وستات

قلت ياه رغم المطر والرعد والبرق والناس واقفة

وقلت اما ان الشعب المصري مش بيفرق معاه حاجه وميهموش ومش بيتأثر او ان الحاجه الشديدة هي اللي خرجت الناس من بيوتها في عز البرد والظروف القاسية

بيني وبينكم انا قلت السبب الاولاني



السواقين ورجال المرور


انا دايما بقول ان في اتنين عرفوا طبيعة الشعب المصري وبستغلوها بشكل فظيع
الحكومة والسواقين
الاتنين عرفوا ان الشعب المصري بيسكت وعايز يعيش جوا الحيط ومبيردش

المهم في سواق اسمه جمال غالبا بركب معاه لان علي الخط ده العربيات محدوده والواحد عارف السواقين وعربياتهم واساميهم

الراجل ده غريب جدا

طبعا هو عارف طبيعة المصريين لذلك بيشخط وبينطر ويزعق واللي مش عاجبة يخبط دماغة في اتخن حيطه وطبعا الناس عاجبها غصب عنها

ده مش الغريب

الغريب لما يقابل في الطريق رجال المرور تلاقيه اتغير خالص ...بيغير طبقة صوته والفاظه وازيك يا باشا وازيك يا بيه وانت عامل ايه

وبعد كده يوزع عليهم ملبس (أي والله) كل اشارة يوزع ملبس علي الرجاله والغريبة انهم بيستنوها

وفي واحد من بتوع المرور غاوي قرايه فيوقف عم جمال العربية قدام بتاع الجرايد مخصوص ويشتريله الجرنان اللي بيحب يقراه ويعدي عليه يدهوله ويقوله نهارك ابيض يا باشا

ومرة لاقيته بيشتري عصير جهينه ، طبعا اكيد مش جايبه لعياله اكيد رجال المرور اكرمهم الله

ما علينا انا بحترم ذكاء الراجل ده

هو فهم طبيعة اللي بيحكموه وطبيعة اللي بيتحكم فيهم وعمار يا مصر

وكفاية بصمات لحد كده ونكمل بعدين