Sunday, April 4, 2010

أتوبيس كومبليه

ملخبط
صح هي كلمة ملخبط دي افضل وصف للي انا فيه
المرحلة قبل ذلك كانت بايظة لكن كانت منطقية ومستقرة
صحيح فيه فساد وفيه ظلم وفقر لكن كان فيه منطق بيحكم الدنيا
دلوقتي انا مش قادر استوعب
مش قادر افهم
كله ملخبط
مين صح ومين غلط
كله ضاع في بعضه
هل البرادعي انسان كويس ولا بيعمل تبعا لاجندة امريكية او غربية مجهولة
هل مبارك هيستمر في الحكم ولا بيمهد للتورريث
طيب هل جمال كويس ولا احنا هنرفضه علشان مبدأ التوريث
هل لينا حق الاختيار اصلا
طيب فين الاخوان
الوفد والتجمع بيعملوا ايه ودورهم ايه
هو الدين بيقول ايه ، يكون لي رأي ونختار الرئيس ولا ده يعد خروج علي الحاكم المسلم
هو قول كلمة حق امام سلطان جائر دي لازم تبقي وشوشه في ودنه ، مين قال كده
طيب لو مش هيسمح لي اني اقولها نعمل ايه
طيب او سمح اني اتكلم وانا قلتها هيعمل في ايه
يعني هو مش عارفها
طيب شيخ الازهر كان صح ولا غلط
صحيح افضي لما اقدم بس ده لشخصه مش لكل الاحكام والفتاوي اللي صدرت عنه
واندفن في البقيع هل ده اشارة لشيء ولا لا يعني شيء علي الاطلاق
هي البلد رايحة لفين
مصر معاها حق في غلق المعبر لانها تحافظ علي حدودها ومن حقا تحافظ علي سيادتها
وان بتوع حماس بيدخلوا الحيشيش والمخدرات لمصر ولما بيشتروا بيستخدموا دولارات مزورة
ولا بتوع غزة دول عالم غلابة محتاجين عطف ودعم من اخوانهم في الدين والانسانية
هل صحيح اننا نطبع مع اسرائيل ونصدر لها الغاز ونستودره احنا ولا حرام
هي اتفاقية كامب ديفيد دي ظالمة ولا كانت في مصلحة البلد في الوقت ده
هو الاسلام الصحيح هو اسلام محمد حسان ومحمد حسين يعقوب ولا اسلام عمرو خالد ولا اسلام سليم العوا وطارق البشري ولا اسلام عبود الزمر ولا الناس اللي بتقول ان الاسلام خسر بالغاء الرق
هو احمد عز بيمثل كويس وعايش في الدور ولا ممكن يكون عنده حق
طيب لما ممتاز القط قال للريس صدقني ياريس بكلمك من قلبي‮.. ‬طول اليومين اللي فاتوا الناس في بلدنا زعلانة أوي‮.. ‬زعلانين عشان عملت عملية‮.. ‬حاسين ياريس إن إحنا السبب‮.. ‬إحنا تعبناك قوي‮.. ‬طول عمرك شايل همنا وبلدنا مليانة مشاكل‮.. ‬تعبناك لأنك بدأت من أول السطر‮.. ‬البلد كانت مفلسة
هل كان فاهم اكتر
هل كان صح
ولا هو مخدوع
صعب حد ينخدع الخدعه الكبيرة دي او علي الاقل يصدقها هو
هل نحن الان في أحداث بداية النهاية يعني نسيب العالم ونعتزل الناس وننتظر قدوم المهدي المنتظر
ولا نشتغل ونتعب ونغلط ونعرف ونصلح وندور ونفكر وننزل اسلامنا علي ارض الواقع بدل ما احنا بنلمعه ونخلي شكله حلو ومقدس بس علي الرف
هما العلمانيين دول افراز طبيعي من الشعب المصري ولا دخيل عليه
طيب هما لما بينادوا ببعض الافكار هل دي افكار الشعب ده ولا دي افكارهم هما
طيب اخلاقيا هل ينفع هما ينادوا ببعض الافكار ويقفوا قدام بعض الافكار علي مزاجهم دون رأي الشعب
هل حتي لو شايفين ده انه لمصلحة الشعب هل ده يديهم الحق ده
هي ازاي امريكا بتدعم نظام مبارك وبتهاجمه في نفسك الوقت
ولا دي مسرحية
مسرحية من جوا مسرحية وعالم كبير كل الناس بتمثل واحنا اللي مش فاهمين حاجه
طيب امريكا دخلت افغانستان علشان تقتل بن لادن طيب مفيش حاجه حصلت
طيب امريكا عامله تمثيليه مع بن لادن
طيب بن لادن حد كويس ومجاهد ولا ارهابي عنده اخطأء في العقيدة
هل اللحية فرض ولا سنة ولا فرض صغير
هل الفارق بين الشيخ ابو اسحاق الحويني ومصطفي حسني كبير جدا ولا ينفع يتحطوا الاتنين في كدر واحد في تصالح
شيخ الاسلام الان هو يوسف القرضاوي أم محمد عبد المقصود
ليه محدش بيتكلم عن جماعة التبليغ والدعوة مع انها في كل قرى مصر
هل هما ناس كوسين ولا مرشدين للامن
هل فهمهم صحيح عن تحديد الاسلام في خمس نقط بس ليس منها علي الاطلاق اي شيء يخص الحياة العامه والسياسية للمسلمين
هل علشان كده الامن بيحبهم وبيساعدهم
هما المسحيين في مصر ناس وحشين قوي وبيدبوا مؤامرات في الخفاء وعندهم اسود في كنائسهم وبيستخدموا السحر الاسود لتعذيب المسلمين
ولا ناس غلبانه وعاديه فيهم الوحش وفيهم الحلو
طيب اتعامل معاهم عادي زي ما كنا بنتعامل مع بعض في المدرسة والكلية ولا لما اشوفه افتح دماغه علشان عايزين بينوا كنيسة
طيب هو ليه مينفعش بينوا كنسية ، دي رغبة اسلاميه ولا حكومية
هو علاء الاسواني كاتب حقيقي وكبير وله الحق في اقحام الجنس في كل تفاصيل روايته ونحن لسه مش مستوعبين الهدف الاسمي من ذلك ولا دي وسيله علشان يبيع كتير ويكبر
خالد يوسف لما بيطلع مصر زبالة وحرامية وشهوانيين وشواذ هل ده الصح ومعاه حق ونسقف له ولا ده قرف وغلط واكيد فيه تطريقة تعبير نظيفة ومؤثرة في نفس الوقت
هل قناة الجزيرة محترمه ومهنية وصادقة ولا هدفها تشوية صورة مصر امام العالم
مين صح ومين غلط ومين عنده الحقيقة
اوباما حلو وكويس ونيته تمام ولا مش هيفرق كتير عن اللي قبله لانه محكومين بسياسه ازلية حطها أغنياء اليهود في امريكا
حماس معاها حق وبتوع فتح وحشين ولا الاتنين غلطانين ولا يستحقوا الشفقه ونخلينا في نفسنا بقي
هي الحياة هتستمر بينا ولا هنموت واحنا صغيرين زي ما صاحبي سمير مات في الجزائر واخونا شريف مات في السعودية
شباب متغرب علشان يلاقي لقمة عيش
امال بقي اللي بيموت في هجرة غير شرعية وبيرمي نفسه في البحر ويغرق علشان الشرطة متقبضش عليه وترجعه تاني للقفص والجوع
هل مبارك رائع وعمل انجازات واحنا جاحدين ده ولا الناس اللي بتموت من الجوع دول اصدق
اتوبيس كام بيروح فين
فين فين ؟؟؟؟؟؟؟؟
مش مهم مين رايح فين المهم انه مليان علي اخره
مبقاش قادر يستحمل المزيد

14 comments:

واصطنعتك لنفسي said...

يااااااااااااه
بجد مندهشة.. مكنتش أتخيل ابداً أن نفس التساؤلات بتدور بالشكل الرهيب ده.. بداخلك وبداخلي وبداخل كل واحد هيقرأ البوست

لكن رغم أن أتوبيسي زي أتوبيسك بحس في لحظات كثيييرة جدااا أنه كومبليه وأني خلاص مش قادرة وخلاص بتخنق.. لكنه لسه يا مصطفى
لازم يبقى فينا لسه فئة بترتب أتوبيسها من جواها وتفضل مكملة ما توقفش
إحنا علينا السعي ومش علينا النتائج
ربنا هيحاسبنا على السعي,, ودينا أمرنا بالسعي،، وعقلنا بيقوم بدوره الصح لما يركز في السعي
السعي نحو القيم المطلقة لا المستترة خلف الأسماء والأشخاص
لإننا بتنقصنا المعلومات اللي نقدر نحكم بيها.. وغالبية المعاني اختلطت.. علشان كده إحنا المفروض نتخطي مرحلة التحليل والتفسير ووضع الأحكام والرد على التساؤلات.. ونسعى أننا نتخطى حاجز الواقع ده لعلنا نقدر نفهم بعدما نخرج من الصورة ونقدر نبص من فوق.. وقتها نعرف كل الردود ده

في تساؤلات كثيرة رمادية هتفضل معلقة.. مش هنعرف أجابتها.. يمكن لإننا قدر لنا أننا نعيش في المرحلة الرمادية دي

وبرغم إن شهوة الفهم تكاد تبتلعنا من وقت للتاني وسط دوامة التساؤلات التي بدون إجابة

إلا إن في رأيي نقطة النور في طريقنا هي السعي..وحسب

أحييك بصدق على البوست يابصمة الوجدان.. وكأنك صرخت بحنجرتي.. فأخرجت كثيراً مما يثقل كاهلي


إيمان

Unknown said...

اخويا الجميل
سلامتك من اللخبطة ،، هو ده الحال فى مصر لو سبت نفسك و لو شوية صغيرين جداً تبص على المرجيحة اللى بتدور بعنف و فجأة تتحول لزحليقة و تخلص اللعبة و تيجى غيرها
أنا فاكر استيتوس كتبتها أستاذة إيمان على الفيس بوك ( اقطع عنك اسباب الالتفات ،، فالملتفت لا يصل ) و نضيف عليها كمان ان محدش يوقف ولو شوية صغيرين غير لتققيم هدفه و طريقه و بعدين ننشغل جداً بتحقيق أهدافنا و نهتم جداً بالنطاق اللى فيه أهدافنا و الناس المشتركين معانا و لو جزئياً فى أهدافنا ،،، لأن فعلاً لو ركزنا مع كل التفاصيل مش هنتحرك من مكاننا
ربنا معاك ياجميل
بوست معبر جداً
تقديرى

Anonymous said...

اشكرك علي كل هذه التساؤلات الي بتحمل في طياتها بعض التشاؤم

لك الحق في التفكير ولكن في النهاية

دع الخلق للخالق

شاهد حق

Fahd said...

الاخ شاهد حق

ربنا يبارك فيك لا شكر علي واجب

فعلا انا شوية متشائم لكن ده مش طبيعه قد ما هو رد فعل شوية من الواقع الصعب

لكن مفهمتش يعني ايه دع الخلق للخالق

طيب انا من الخلق دي وعايز اعرف انا فين ورايح فين

بحاول اني افهمها باي طريقة غير انها ممكن تكون سلبية بس الصراحة مش قادر

ياريت توضح

Fahd said...

إيمان

مش موضوع شهوة التساؤل قد ما هو انك عايز تفهم وتستقر علي وضع ثابت مقنع

يلم الليلة دي كلها في اطار منطقي قوي يستحمل اي ضغوط

Fahd said...

دكتور احمد

انا بحبك والله وانت اخويا الاجمل

ربنا يعزك بس الفكرة انا مش بتلتف
انا بحاول احدد موقفي من حاجات كتير

حتي الصحوة الاسلامية الان في مفترق طرق

فيه كمية انقسامات رهيبة

مين مع مين
مين صح ومين غلط

وأنت تائه في النص

Heba said...

حلو أوى يا مصطفى. معبر أوى وموجع أوى

Unknown said...

شاكر لكم زيارتكم وسعدت بمدونتكم

abdo said...

السلام عليكم
وحشتنى تديوناتك
كل دى تساؤلات
انا عندى سؤال
هو منين يودى على فين ؟
بس انت فعلا معاك حق فى حاجات كتير
طيب ياترى احنا دورنا ايه ؟
والمفروض احنا كده صح ولا غلط
وياترى احنا التزامنا ده صح ولا غلط
التزامنا بدينا مش التزامنا الصمت
وياترى كل واحد فينا قدم ايه لبلده وقدم ايه لدينه
وياترى حلم ال13 جنيه هيتحقق ولا لأ
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

amar hedar said...

دع الخلق للخالق

لا اقصد بها السلبية اطلاقا

اقصد معني التوكل

واقصد موضوع شيخ الازهر خصوصا ونهايته

انا فكرت فيها لكن التفكير وصلني لنهايه واحده ان اعماله اصبحت بينه وبين ربه ومصيره سيحدده الواحد هو اعلم بالنفوس

يا عالم يا هوووووووووووو said...

أظن ببساطة لو إن مرجعيتنا القران و السنة .... كل حاجة هاتكون واضحة قدامنا زي الشمس ...... إللي يخليك تحس الإحساس ده د راغب السرجاني
بالضبط بيفكرني بفيلم
Matrix
شوف الفيلم وانت تفهمني

Almogadded said...

اكثر من رائعة اعتقد الان انك اصبحت اكثر احترافية وقد حان الوقت لتدخل المعترك الصحفى المعارض ممكن حاجات كتيير تتغير

Unknown said...

شكر الله لكم وسعدت بزيارتكم

مهندس مصري بيحب مصر said...

معظم الأسئلة دي الواحد حسم إجابتها مع نفسه
لكن برضه لسه فيه أسئلة منها محيراني
و مش عارف إجابتها الصح ايه
بوست قوي يا صديقي