Saturday, May 10, 2008

عندما تكلم الشيخ طلبة

كنت لما بتعب اروح له علي طول ..كان دايما بيريحني .. يمكن كنت عايز يكون لي جد عايش اتعلم منه الخبرة واعرف منه معني الحياة لكن ربنا عوضني بالشيخ طلبة
هو صحيح عجوز جدا
هو صحيح تعبان ويمكن يموت قريب
لكن الراجل دماغه جامده جدا
كنت بروح له اول ما دخلت لما كبرت وبقيت مراهق
ولما رحت الجامعه برضه
ورحت له علشان الدي اف
كان عنده ولا تزال حكمة وفكر و عقلية وبعد نظر و
وكان لازم اروح له في الازمة اللي بلدنا بتعاني منها دي
كنت مخنوق ومضايق وتعبان
ورحت للشيخ طلبة الرجل العجوز الذي جلس دائما واللي ان يموت فوق اريكته الخشبة العتيقة ويشرب دائما والي ان يموت منقوع الدوم الضريبة التي ادفعها كلما ذهبت اليه
و
السلام عيكم
وعليكم السلام
ازيك يا شيخ طلبه
ازيك يا ابني أخبارك ايه
زفت يا شيخ طلبه الحياة بقت صعبه
اهدي يابني بس وقولي في ايه
اقولك ايه ولا ايه يا شيخ طلبه انت مش شايف اللي بيحصل في البلد احنا بندبهدل يا شيخ طلبه انا جوايا نار
طيب بس هدي اعصابك كده علشان نعرف نتكلم
قلت :انا حاسس اني عايز اعيط بجد انا صعبان عليا حال الناس والشباب انت مش بتشوف الناس بتتبهدل ازاي في المواصلات وازاي بتتبهدل علشان لقمة العيش وبعد كل ده كل حاجه تغلي بيعملوا ده بدم بارد مش هاممهم مش فارقه معاهم الناس اللي كانت بتنام جعانه دلوقتي اليوم كله هيجوعوا
انا رحت مرة اشتري لحمه لقيت واحده رايحه تشتري ربع كيلو تخيل يا شيخ طلبه صعبت عليا بس اللي خلاني احسن انها كويسه ان في واحده راحت تتحيل علي الراجل الجزار انه يديها ماسورة بخمسين قرش تعمل عليها شربة
قال الشيخ طلبه وهو يربط علي كتفي : معليش يابني هتتحل باذن الله بس روق كده تشرب حاجه
نظرت له في رعب وقلت : ارجوك لا شكرا
قال فيما معناه ودي تيجي برضه ونادي بصوته الواهن ان يحضروا لي هذا المشروب الشنيع منقوع الدوم ويجب ان اشربه
قلت له وانا صوتي محنوق بالبكاء : هما بيعملوا كده ليه ، هما مش حاسين بالناس ، دي كل حاجه غليت ، تعرف يا شيخ طلبه زمان الواحد لما كان مش بيلاقي اكل بيقول هعمل شوية مكرونه تعالي شوف دلوقتي تتكلف كام ،المكرونه باربعه جنية ونص والطماطم مش عارف بكام والزيت بكام
قال الشيخ طلبه بصوت هاديء مطمئن : ده غباء منهم يا ابني بس ده في مصلحة البلد
اندفعت قائلا : في مصلحة البلد؟؟ ازاي في مصلحة البلد
قال : لو انت عندك فرخة بتبيض لك بيضة دهب كل يوم هتعمل معاها ايه علشان تفضل تديك
قلت له : اخلي بالي منها ومعملش زي العبيط اللي دبحها علشان يعرف مصدر الدهب فين
قال : عليك نور هما بقي اغبيه، دلوقتي هما بيخنقوا علي الناس ويخنقوا عليهم كده بيعجلوا في نهايتهم
قلت : ازاي يا شيخ طلبه وهما عمالين ينهبوا في البلد
قال : اصبر عليا هقولك ، لو هما فعلا عايزين يستفيدوا من البلد دي بجد علي المدي البعيد مش بيبصوا تحت رجليهم كانوا يهدوا اللعب وكده كانوا هيلعبوها صح لكن هما اغبية وكل واحد بيقول يلا نفسي ومش مهم بكره هيكون في ايه
يابني انا شايف اللي بيحصل كده كويس وكويس جدا كمان
في هذه اللحظة دخل المنقوع الفظيع يتطوح علي صينية معدنية تغير لونها بفعل الزمن
وقال لي الشيخ : اشرب يا بني
اخذت رشفة صغيره لا تكاد تتجازو اربع ميلي مترات وقلت : ازاي اللي بيحصل ده عجبك
قال : يابني كده الشعب بيفوق
شعبنا مريض تم تسيسه من زمان من ايام محمد علي ، عمل علي اخضاع هذا الشعب وترويضه وجم عياله من بعده سلاله الملوك ولما حصلت الثورة المباركه كان المفروض يحترموا الناس ويعوضوهم سنين العذاب والحرمان ويدوهم حريتهم ويخلهوم يحكموا نفسهم بنفسهم لاول مرة من زمان ،لا الشاطرين استغلوا الموضوع وركبوا علي كتاف الشعب والناس لو كان قانون القلم السياسي علي ايام الملك بيخليهم يخافوا شويه دلوقتي قانون الطوارئ علمهم الادب بجد
قلت : معاك حق يا شيخ طلبه ، جمال عبد الناس اتبع مثل جوع كلبك يتبعك ، علشان كده اهلينا خايفين جدا علينا ودايما يقولونا امشي جنب الحيط يابني علشان تاكل عيش
قال : عليك نور، المريض ده لازم يفوق ولازم يعرف نفسه ويصحي بقي تعرف انا عاجبني الحركه بتاعة الفيسفوك
قلت : قصدك الفيس بوك يا شيخ طلبه
قال : ايوه ايوه ، يمكن ناقصها شوية خبره هتيجي مع الزمن بس ده بيثبت ان اهليكم فشلوا في انهم يورثوكم جينات الخوف والذل والانكسار والحمد لله دي مبشرات كبيره
قلت : ايوه يا شيخ طلبه فعلا وكمان المدونات كانت فاتحة خير لكل الشباب
قال الشيخ طلبه وهي يتكئ علي جنبه علي اريكته الخشبية العتيقه: كل يابني كان بيراهن علي الشباب ، لكن الحمد لله يمكرون ويمكر الله طلع شباب زي العسل يمكن متهور شويه ويمكن كمان مندفع لكن واحده واحده هيتعلم من اخطاؤه تعرف فشل اضراب 4 مايو ده كان درس كويس جدا علان يتعرفوا علي الواقع ويحددوا نسبة الخطأ علشان لما ياخدوا قرار بعد كده يكون اقرب للواقع
قلت : صح يا شيخ طلبه بس في حاجه في بعض المدونين هما كويسن وكل حاجه وبيبذلوا مجهود جامد بس بيستخدموا الفاظ مش كويسه لدرجه ان في منهم كاتب علي مدونته انها ترحب بالبذاءات هل ده صح
قال الشيخ طلبه: بص يابني زي ما في كده في كده لكن احب اطمنك انه لايصح الا الصحيح واما الذب فيذهب جفاءا واما ما ينفع الناس فيمكث في الارض
صعب جدا وضد سنن الحياة ان الفوضي او الابتذال او البذاءه وقله الاحترام وانعدام الاخلاق تصنع حضارة او تقدم حقيقي
فاما ان يكتشفوا انهم علي خطأ فيعودوا الي الصواب او يظلوا كذلك فيذهبوا جفاءا حيث انهم لن ينفعوا الناس لان الناس لن تقبل ان يقودها من لا يحترمهم ويحترم عادتهم واخلاقهم وصدقني حتي ولو نجحوا فسكون نجاح مؤقت فارغ غير مستقر لانه يصطدم مع الطبيعة حيث لا يصح الا الصحيح
قلت له : طيب نرجع للشعب المريض ازاي انت شايف ان اللي بيحصل كده في صالحه ومفيد ليه وايه اللي المفروض الناس تعمله وهل لو جه حد تاني هيحل المشاكل المتلته دي لمجرد انه راجل كويس ........
قال لي مقاطعا : ايه يابني بالراحه عليا ، خليها المرة الجاية انا تعبان الان
قلت :طيب انت كنت قلت لي انك عندك حل لموضوع المواصلات والزحمة الرهيبة دي اللي بقت وردية تانيه
قال : ايوه ايوه مش حل واحد دي حلول بس يلا مع السلامه دلوقتي ومنتظرك

33 comments:

يا عالم يا هوووووووووووو said...

انا قلت احجز مكان الأول

يا عالم يا هوووووووووووو said...

مش فاهم مين دف ده وإيه حكايته
بعدين مين الشيخ طلبة ده مش مفروض تبين شوية يا عسل
وبعدين والأهم من كل ده.....الحاجة إللي غاظتني اوي......ماله الدوم يا بني ادم
ده حتى كله فوايد

Anonymous said...

كويس انك ناقشت حال البلد اليومين دول على مدونتك , بس الحوار كان محتاج شوية ملح وبهارات عشان يطظبط وبعدين عم طلبه ده حقيقى ولا شخصيه من خيالك , اصله لو حقيقى ماكنش هايستحملك ,كويس يا تيفا , اهم حاجه انى عرفت انك مابتحبش الدوم عشان بعد كده لما نخرج مش هانشرب غير الدوم.

ahmad senosy said...

جزاك الله خيرا يا اخويا على كلامك الرائع و اسلوبك المشوق ده
انا اول مرة اعلق عندك بس بقرأ كتاباتك كلها و متابعها

و تعليقى على هذه التدوينة : ان ربنا سبحانه و تعالى يرفع عنا الغلاء و الوباء و يقينا شر الظالمين المفسدين

أحمد السباعـي said...

أسلوب شيق كعادتك دائما

من صغرك وانت دماغك عالية وليك أفكارك وقناعاتك الخاصة

بحكم قرابتنا
مين الشيخ طلبة ؟؟

وربنا يرفع عنا الغلاء والبلاء

وفي انتظار حلول الشيخ طلبة

Anonymous said...

السلام عليكم
التدوينة المرة ديه فكرتها حلوة من حيث الحديث مع الشيخ الكبير مما يمثل الحكمة التي تقنع الكثيرين
و لكن الأسلوب نص نص
أحلى ما فيه عنصر التشويق , فنحن في انتظار الحلول , و لكن بلغة أبدع

اللهم ارفع غضبك و مقتك عنا

Fahd said...

يا عالم ياهوه

اخي ياسر اشكر لك كثيرا وجودك واهتمامك
اعرف انك تمزح بالطبع فلن يلفت انتباهك من الموضوع كله الدوم ومش عارف ايه
لكن دمك خفيف بجد واحسب ان كل الناس لحظت ده
ربنا يكرمك ونشوف لك اعمال ميلة قريبا


انونمينس

تكلمت عن الحوار محتاج شوية بهارات

طبعا انت عارف انت البهارات غالية اليومين دول
وانا معنديش مانع تشربني دوم ربنا يكرمك


احمد سنوسي

ان كان من شأن تعليق ان يبهجني فهو تعليقك

اشكر لك تعليقك واطرائك لمدونتي الصغيره واتمني ان اظل عند حسن ظنك

Fahd said...

احمد السباعي

حبيبي

مشكور علي الكلام الجميل ده

ايه الحلاوة دي بس

تشريفك لي علي مدونتي يستحق كل تحية

وبرضة بحكم قرابتنا مش هقولك علي مين الشيخ طلبه ازاي متعرفوش
اكيد هيزعل منك



ام عمارة

اسلوبك رائع في النقد

فلقد تم في شياكة واناقة جعلتني لا اهتم بكون نقد بقدر ما جعلتني اعيد النظر في الاسلوب

بس كنت عايز اعرف اكتر ايه الاعتراض هل كان علي الاسلوب لانه بالعامية ولا الاسلوب حتي وهو بالعامية

بالنسبة للعامية في كتبا كتير اختلفوا هل يتكلموا باسلوب الناس علشان يوصل بسرعه ولا يتكلموا فصحي والمفروض الناس اللي ترتقي

لكن في كتاب زي احمد خالد توفيق ونبيل فاروق والناس دي حلت المعادله الصعبه كانت تكتب بفصحي جزلة بسيطه تعبر عن الناس العاديين دون تكلف

انا بقي بحاول

Empress appy said...

بجد كلامه يحترم جدا وله وجهه نظر حلو قوى
انت عاوزنا نبص للموضوع بموضوعيه وبهدوء بس اتعشم ان كلامه يكون يصح وميكونش العكس
انه يعنى هما بيقهرونا علشان منفتحش بقنا خالص بس برضه بعينها
المهم انا بحب عصير الدوم ههههههههههههه

Maha said...

:)

ربنا يديه طوله العمر وحسن الختام الشيخ طلبة :)

ما شاء الله .. استمتعت جدا بالتدوينة

Anonymous said...

انى احبك فى الله والله الموضع دة شيق اوى اوى بس انا كنت عاوز اعرف مين الشيخ طلبة دة وبعدين فين بقيت الموضوع وازاى هيحل المشكلة بتاعت المواصلات وبعدين انا عرفت لية انت بتشرب فرولة مالو الدوم بس؟؟؟ اة منك ياعفريت

Fahd said...

appy

طبعا الشيخ طلبة هيموت من الفرحه لما يعرف انك بتحبي الدوم بس لما يقدمهولك ابقي اشربيه

اري ان وجهة نظره صحيحه بدليل ان الناس بتفوق علي الاقل لو معملتش حاجه عرفت ان دول حرمية

Fahd said...

مها

لكم سعدت بتعليقك الرقيق

واضافتك لبعض المواضيع التي شدت انتباهك

جزاكم الله خيرا



الا خ الانمونيس اللي عرفته

اصبر يا اخي كل شيء باوان

الشيخ طلبه طردني من عنده المرة اللي فاتت انا كنت عايز اكمل بس انا رايح قريب وهكمل الموضوع ادعو لي وله

Jana said...

الشيخ طلبة ...ربنا يديله الصحة ..كلامه يقطر حكمة
ربنا يباركلك فيه ويزيد من امثاله

ببساطة عصير الدوم معروف عنه تعديل الضغط ...لذلك الراجل هادى بالرغم من ان كل حاجة حوالينا ترفع الضغط..وده اللى خلاه يفكر بهدوء ويقولك كلمتين من الآخر ..

عجبنى اسلوب الحوار
ويبدو لى غير متكلف

تحياتى

Fahd said...

جنى

كلامك جميل قوي

اكيد الشيخ طلبة هيفرح بالكلام ده

انا كده فهمت ليه الراجل كان يشربني منقوع الدوم ده علي طول علشان انا متسربع ومستعجل علي طول
بس برضه مش هشربه

متتصوريش هو فظيع قد ايه الدوم طبعا

جزاكم الله خيرا علي الزيارة والتعليق الظريف

الفاتح اليعقوبي said...

السلام عليكم
تعرف يافهد القصة وما فيها ان رغم اصطدامنا بالجيل القديم ده فكرا في كثثير من الاحيان لكن اللي بيقدر منهم الشباب بيخرج منه كلام محترم جدا
وعم طلبة ده مثال واضح انه حاسس بيك وشد حيلك عشان منقوع الدوم رغم انه بيضيع السكر والضغط شد حيلك وربنا يديله الصحة والعافية
والسلام

الفاتح اليعقوبي said...

ايه ده مخدتش بالي
انت تقرب لاحمد السباعي وعمر ومحمد عباس صح
شكلك كده كنت في جامعة القاهرة
طمني
والسلام

آفاق الحرية said...

هههههههههههه
هي بصراحة مش فرخة بتبيض دهب
ده ما شاء الله مزرعة دهب

Fahd said...

الفاتح اليعقوبي

شرفت المدونة

انا عممت اننا مصطدمين بالجيل القديم لكن ده علي اجماله مش صح قوي

وطبعا الشيخ طلبة حته سكرة وملهوش علاقة لا بالقديم ولا الجديد

انا كنت عايز اطمنك بس للاسف

احمد السباعي ومحمد عباس وعمر هما اللي قرايبي

وجزاكم الله خيرا

Fahd said...

افاق الحرية

علي رايك يا اخي شر البلية كا يضحك

شرفت المدونة

واتمني ان تشرفني دائما

جزاكم الله خيرا

الربان said...

تحياتي

طبعا الحكومة مسؤولة عن الغلاء...لكن
هذا لا يعفينا كشعب من المسؤلية لان منا
المحتكرين...و تجار السوق السوداء و عديم
الضمير...

لابد ان تتعاون الحكومة مع الناس سويا
يعملا علي تخفيف وطأة الغلاء.

تحياتي و تقديري

أحمد سعيد بسيوني said...

بسم الله
جميلة جدا دماغ الشيخ طلبة
صحيح راجل فاهم وخيرته في الحياة كبيرة
صحيح ... احلك اوقات الليل والظلمة هي تلك التي تسبق الفجر
تحياتي

ابوزياد الفاتح said...

مدونه جميله جدا
وكلام ممتاز ورائع
ربنا يكرمك
وحال البلد اليومين دلو لا يسر عدو ولا حبيب
ربنا يعدينا منها على خير

Anonymous said...

اولا السلام عليكم انا كنت بقرا شويه كده على الماشى بس اللى حصل ان حكاية الشيخ طلبه شدتنى قوى والاسلوب كمان شدنى اكتر بس كان نفسى اعرف ايه الحلول اللى قالها الشيخ طلبه

Anonymous said...

انا كنت عاوز اقلك انى قرتها تانى على زعم انى هلاقى بقيت الموضوع بس اظاهر انك خفت تروح عند الشيخ طلبة تانى مالو بس الدوم؟؟؟ دا انا حتى مبحبوش

Anonymous said...

انا نسيت اقول حاجه انا قريت حكاية الشيخ طلبه اكتر من مره علشان اعرف باقى الكلام مش عارف وخايف ليكون زى محمد صابر ما قال ان انت خايف بس انا مش متوقع منك غير روح الحماس مش الخوف ده على الرغم من انى انا كمان بخاف من الشيخ طلبه ده قبل ما اعرفه

Osama Sherif said...

السلام عليكم أخي فهد
طبعا الأسلوب جيد جدا ويشد الانتباه ما شاء الله

لكن مع احترامي الشديد لشيخنا الشيخ طلبة
إلا إني شخصيا ضد فكرة الإضراب دي تماما
كنت بافكر اعمل تدوينة خاصة بيها، لكن مافيش وقت بقى وانت عارف هندسة ما بترحمش، ادع لي
لكن اسمح لي اكتب لي كلمتين هنا كده في السريع

يا شيخ طلبة
احنا 4 عميان، جابوا لنا فيل، وقالوا لنا أوصفوا لنا شكل الفيل ده
فأول واحد مننا مسك زلومته وقال: الفيل ده مخلوق طويل زي الثعبان كده
والثاني مسك رجله وقال: لا لا ده عامل زي جذع الشجرة
والثالث مسك ديله وقال: يا جماعة ده عامل زي الدودة، صغير ورفيع
والرابع مسك ودنه وقال: ده عريض ومفلطح كده
واكتشفنا في الاخر، ان ولا واحد فينا عرف يوصف الفيل صح

حبة شباب على "الفيسفوك" قالوا لنا إضراب
فمننا اللي قالوا: اه يعني مظاهرة، بينا ع التحرير
ومننا اللي قالوا: لا كل الموضوع انك ما تنزلش من بيتك وخلاص
ومننا اللي قالوا: ده عصيان مدني العالم المتحضر بيتبعه
ومننا اللي ما قالوش حاجة، قعدوا يكسروا وينهبوا في حاجات الناس الغلابة في المحلة

وحصل ظيطة ومولد وصاحبه غايب
عشان كده انا كنت متفق مع الاخوان لما رفضوا المشاركة فيه في الاول
بحجة إنه لم يعرض عليهم تنظيم الاضراب
وانا متفق معاهم تماما، فين القائد يا جماعة؟ فين اللي يتحمل المسئولية؟ فين اللي يوجه الغوغاء دي؟
شباب الفيس بوك؟؟؟

يا شيخ طلبة
اللي حصل في العراق، واللي بيحصل في لبنان، حصل عندنا في المحلة
أنا آسف دوشتك معايا يا شيخ طلبة، بس كان لازم أعرف هل حضرتك ما زلت متمسك برأيك؟

الموضوع أكبر من كده وعايز كلام أكتر من كده
لكن كفاياني رغي بقى
وباعتذر جدا جدا يا أخ فهد على الزحمة اللي انا عاملها هنا دي

جزاك الله خيرا
والسلام عليكم

Fahd said...

الربان

احنا طبعا علينا دور كبير

احنا الاساس سواء في تحمل بعض ما يحدث او في العلاج

سعدت بمرروك



احمد سعيد

نتحتاج في عصرنا هذا لعنصر مهم هو الفهم
للاسف كثيرا لا تجده

اشكرك علي مرورك



ابو زياد

للاسف حال البلد لا يسر عدو ولا حبيب

ولكن معني هذا ان نهب لنصلح شأنها ليس كما يقول البعض ان هذا يدعو للسلبية والاستسلام

Fahd said...

شباب شرم
محمد صابر

ازيك يا باشا نورت المدونة

انا مش خايف قوي

وانا اشرب اي حاجه علشان الشيخ طلبه

البقية هتنزل خلال ساعات ان شاء الله

واتمني ان تكرر الزيارة


سامح بكر

لا ياعم مش خايف من الشيخ طلبة

والراجل مش بيخوف يا سامح

تحب تيجي معايا المرة الجاية

Fahd said...

اخي خالد

المفروض اضرب ليك تعظيم سلام لاهل هندسة ولاهل كهربا باور علي وجهة الخصوص

اشكر ليك تعليقك الجميل

ولكن الشيخ طلبة لم يدعو للاضراب ولم يقل رايه فيه
قال ان هذا علامة ايجابية ان الشباب مش تافة وابله ودماغه فاضية

وقال الناس دي ينقصها الخبرة والحكمة وهذه اشاياء تاتي مع الوقت

ايه رايك الشيخ طلبة يرأس حزب الفيسفوك

اخير سعدت بتعليقك وانتظرك مجددا

khobayb said...

رائعة يا صديقي

بارك الله في الشيخ طلبة وكلامه الطيب

وبارك فيك

---

حد ميحبش منقوع الدوم يا راجل ؟

موناليزا said...

على فكرة عمك طلبه ده معاه حق انا كمان متفقة معاه ماهى كلما ضاقت حلقاتها فرجت
وهى ضاقت علينا اوى يبقى الفرج قرب

Fahd said...

خبيب

جزاك الله خيرا ياخي

اخ انا ش بحب منقوع الدوم تحبه انت




مناليزا

الشيخ طلبه اكيد هيفرح لما يعرف ان المناليزا متفقه معاه

بس هو مش عمي هو من عمر جد والدي الله يرحمه ويرحم جدي